Resous Enpòtan pou Evite Degèpisman
Yo mande w degèpi? Ou pè yo pral mande w sa byento?
Pou aprann plis sou dwa ou si yo mande w degèpi, vini nan yon sesyon vityèl enfòmasyon yon avoka PTLA ap fè chak madi a 9è am.
Entwodiksyon
Lalwa nan eta Maine plizoumwen klè sou pwoblèm lokatè (li plis sou dwa lokatè nan Maine nan seksyon kote nou pale kesyon lojman lokatif), lwa yo pa fin twò klè sou dwa moun ki rete nan motèl, otèl ak kay kote yo lwe plizyè chanm. Se la nou reponn kèk nan kesyon yo mande pi souvan sou tip lojman sa yo.
Eske mwen gen dwa a yon avi degèpisman alekri ansanm ak yon odyans tribinal?
Anjeneral, ou pa yon lokatè si ou rete nan yon motèl oswa otèl. Kidonk mèt kay la kapab mete w deyò apre yon ti bout avètisman san nou pa ale nan tribinal. Men repons la kapab diferan si ou rete la lontan. Li plis anba a.
Si ou rete nan yon kay ki gen plizyè chanm yo lwe, èske w se yon lokatè? E si ou rete nan sa meriken yo rele yon "inn," yon motèl, oswa yon kay ki lwe ak plizyè moun pou yon bon bout tan? Oswa ou peye lwaye chak mwa, olye de chak jou? Sa a se yon pati ki pa fin twò klè nan lalwa. Mèt kay la kapab di ou pa yon lokatè paske yo genyen yon “innkeeper’s license” (yon lisans ki pèmèt li fonksyone tankou yon otèl) oswa li genyen yon lisans pou “lodging house” (yon kay ki lwe ba plizyè moun). Men gen plis pase sa.
Si mèt kay la aji tankou yon mèt motèl oswa otèl lè li:
- bay dra ak sèvyèt pwòp
- gen aksè a chanm ou epi netwaye li
- fè moun ki rete la yo siyen antre sòti nan yon rejis
- afiche pri chanm yo nan chak chanm
- anplwaye yon ajan resepsyon
- meble chanm yo okonplè
- lwe chanm yo pou yon ti peryòd sèlman
- fè konnen li se yon kote pou touris ak moun ki lwe kote pou yo dòmi, ak manje.
nan ka sa a ou siman pa yon lokatè.
Men si mèt kay la pa fè bagay sa yo, lalwa kapab trete l tankou yon moun ki lwe kay. Sa vle di ou gendwa genyen dwa jiridik yon lokatè genyen, epi yo pa kapab mete w deyò legalman san yo pa bay yon avi alekri ansanm ak yon lòd pou pase devan tribinal.
Lòt eleman enpòtan se:
- konbyen tan ou rete la epi konbyen tan lòt moun ki nan kay la rete la
- disponibilite pou jwenn kote pou fè manje
- ki kalite antant alekri w la, si ou genyen youn
Kidonk jis genyen yon lisans “lodging house” pa ase. Si pwopriyetè a aji plis tankou yon mèt kay, lalwa ap trete l tankou yon mèt kay. Epi lokatè yo ap gen plis proteksyon jiridik.
Si ou rete nan yon motèl, inn, oswa kay kote plizyè moun lwe chanm epi ou pa si de dwa w, tanpri rele Pine Tree Legal Assistance.
E si mwen te konmanse rete la pou sèlman de twa jou epi mwen vin rete la pou plis tan?
Yon dwa ki klè dapre lalwa nan Maine se dwa w pou pa peye “taks itilizasyon” si ou rete la plis pase 28 jou. Règ sa a aplike pou:
- otèl
- kay kote plizyè moun lwe chanm
- kanmpin pou touris
- kanmpin pou kay sou woulòt
Kote sa yo dwe chaje “taks itilizasyon” sou touris ansanm ak lòt kliyan ki pa vin pou rete lontan. Men si ou rete pi plis pase 28 jou, pwopriyetè a pa ka kontinye chaje w taks sa a. Epi tou, mèt kay la oblije remèt ou taks ou te peye pou premye 28 jou yo. Lwa sa a aplike si ou:
- pa gen yon kay pèmanan, oswa
- ou lwen lakay ou poutèt travay oswa pou w kapab ale lekòl
Aprann plis sou ranbousman “taks itilizasyon” sa a la a.
Ki kote mwen kapab ale si yo mete m deyò epi mwen pa gen lajan?
Men de opsyon ki posib:
-
Ale nan biwo komin kote ou rete a oswa kote ou ta renmen rete a epi mande pou “Asistans Jeneral.” Se yon pwogram chak vil ak komin ki nan Maine dirije pou ede moun peye pou bezwen debaz si yo pa genyen okenn lòt resous. Li plis sou atik nou an sou Asistans Jeneral nan Maine.
-
Tout vil Maine, ak kèk gwo komin, gen abri pou moun ki pa gen kay ki ap viv nan lari. Pou jwenn yon abri ki pi pre w, kontakte Maine State Housing Authority (Otorite Lojan Eta Maine).
Èske gen yon jan pou mwen kenbe pitit mwen lekòl jiskaske mwen jwenn yon lòt kote pou m rete?
Pitit ou gen dwa pou yo kontinye ale lekòl, menm lè ou pa gen kote pou rete oswa ou nan nenpòt kay tranzisyon.
Si ou rete yon kote tanporè (ak zanmi oswa fanmi, oswa nan yon motèl, yon abri oswa yon kanmpin, pa egzanp), ou kapab chwazi pou voye pitit ou swa:
- nan ansyen lekòl yo (si li pa pi lwen pase inèdtan) oswa
- nan lekòl ki nan distrik lekòl kote ou fè ladesant la.
Lekòl la dwe bay mwayen transpò. Si pitit ou ale nan lekòl nan zòn nan, yo ta dwe kapab kòmanse touswit, menm si yo poko transfere dosye lekòl yo. Yon fwa ou kite kay tanporè a pou yon kay pèmanan, pitit ou yo kapab rete nan lekòl kote yo ye a jiskaske ane lekòl la fini, si se chwa w. Si w genyen kesyon oswa pwoblèm nan lekòl la, tanpri kontakte KIDS LEGAL, yon pwojè Pine Tree Legal Assistance.
Si w gen plis kesyon, tanpri kontakte Pine Tree Legal Assistance.